إيسو ….. موهبة كوميدية تنطلق من الإسكندرية

حوار:هند حامد
عصمت الصغير أو( إيسو) كما يطلق عليها فنانة سكندرية ظهرت يقوة على الساحة الفنية للثغر بعدد كبير من العروض الكوميدية و الاستاند أب كوميدى و التى نجحت فية فتاة لأول مرة . وزادت شعبيتها بعد تقليدها لشخصية الفنانة الكبيرة اسعاد يونس فى مسلسل ميزو على التيك توك و التى اعجبت بأدائها على صفحتها . و تقول أيسو :” أنا ممثلة ومطربة ومدرسة موسيقى”
“الحقيقة منذ صغري كنت بحب الفن جدا كنت بغني لزمايلي فالمدرسة الإعدادية فالحصص الفاضية و مرت سنين ودخلت الجامعة و اتخرجت وأنا برده بعيدة تماما عنه لحد مافيوم رايحة مع أختي بالصدفة اشجعها تدخل ورشة تمثيل فإسكندرية لإنها برده بتحب التمثيل… واختبرنا إحنا الاتنين إختبار تمثيل للقبول بالورشة.. ساعتها حفظت اسكتش وقولته بطريقة اللمبي اللي هو إزاي بنت وأعمل لمبي كنت ومازلت مجنونة لكن اتفاجئت من ضحك المخرج جدا وقالولي إنتي كوميديانة وتم قبولي أنا وأختي..بعدها اتشجعت إني اقدم بمسابقة غنا فنفس المكان فكنت الحمد لله الأولي فى البنات”
وانطلقت بعدها ورشة تمثيل ثم ورشة غنا وتوالت الورش لحد مااكتشفني المخرج الكبير( إيهاب يونس) وانضميت لفرقة( الدانة للفنون المسرحية) وعملنا عروض ناجحة جدا بالإسكندرية مثلت وغنيت فكل العروض دي منهم عروض حكي زي عرض(كوارنتين ) عملت فيه دور فتاة صعيدية بتعاني من تقاليد المجتمع وظلمه سواء فالقرية أو البندر وعرض الأطفال (جوا دماغي) اللي أخد كتير من الجوايز بملتقى نغم للمسرح لعبت فيه دور أم الطفل دودو اللي كانت شديدة عليه وكل اللي هاممها إنه يفضل يذاكر وبس ورشحت فيه لجايزة أفضل ممثلة عروض أطفال لكن هيئة التحكيم فضلت تدي الجايزة لطفلة تشجيعا منهم للأطفال عندهم حق بصراحة.

وأيضا شاركت فالعرض الملحمة (منين أجيب ناس) لنجيب سرور لكن برؤية جديدة ل إيهاب يونس عملت فيه دور نعيمة.. وعروض الجراند زي (المسحراتي)مثلت فيه الزوجة المعاصرة اللي كل اللي هاممها من رمضان هو ظهورها عالسوشيال ميديا بصور مزيفة غير الواقع.. وعروض إحتفالية للأطفال زي سكتش ( إحنا العيد والعيدية) بأكاديمية إسبارطة بالإسكندرية عملت فيه دور البلياتشو البنت.. وعرض (الأوضة)مثلت فيه فتاة بتجسد كذا مشكلة عاشتها من كذا منظومة فبلدها.. وعرض (البؤساء)عملت فيه دور الأم المجنونة اللي عايشة فقاع المجتمع والفقر خلاها تجبر بنت صاحبتها على البغاء.. وعرض (عودة ريا وسكينة) لعبت فيه دور سكينة والعرض لاقى ترحيب كبير من الجمهور.. والعرض المميز جدا (كف إيزيس) اللي حصل على شهرة واسعة بالإسكندرية والقاهرة وكمان خارج مصر وجالنا عروض خارجية للعرض ده بالذات وحيتم عرضه للمرة الرابعة إن شاء الله بدار الأوبرا بالإسكندرية يوم ١٩ مارس ٢٠٢٣ .. كل العروض دي تم عرضها على خشبة المسرح الكبير بمكتبة الإسكندرية ودار الأوبرا بالإسكندرية وكمان شاركنا فمسرح الغرفة بمساحة سوڤيتا الفنية

وكان تفاعل الجمهور مع عروضنا كبير جدا وناس كتير شافوا فيا مشروع نجمة منهم الدكتور الكبير (أحمد يونس) دكتور الفنون الشعبية بأكاديمية الفنون بالاسكندرية والفنان الاستاذ (إيهاب مبروك) والأستاذ( سامح الحضري) والفنانة (دنيا عزيز) وأخرين أساتذة أفاضل

الحقيقة الفرقة مبخلتش عليا بأي دعم وكان أستاذ (إيهاب يونس) دايماً بيشجعنا وبيدينا فرص من إيمانه بموهبتنا وشجعني لممارسة فن بالنسبالي جديد هو الاستاند أب كوميدي وبمساعدة الأستاذ الستاند أب كوميديان (بهي الدين) عملنا أول عرض استاند اب كوميدي لفرقة (الدانا للفنون المسرحية) وكان عرض ناجح جدا والناس شجعتني جدا أكمل فيه وفعلا عملنا عرض ستاند اب كوميدي للمرة التانية بمسرح أستوديو نغم بالإسكندرية ولاقى نجاح كبير مع زمايلي الملهمين جدا ليا وأعضاء فرقة الدانة للفنون المسرحية (زينب كمال) و(سارة خالد)

وحاليا انضميت بأسم فرقة( الدانا للفنون المسرحية) بملتقى نغم للمسرح بدورته التانية دورة المخرج( سامح بسيوني) لعرض المونودراما (الممثلة) إخراج الفنان ( نايف الترجمان) المشارك بملتقى نغم للفنون المسرحية حيعرض يوم
١٦ مارس بإذن الله الساعة ٩ م بمسرح أستوديو نغم بالإسكندرية

كمان ساعدتني صديقة ليا على الدخول فعالم التيك توك وجسدت عبر تطبيق تيك توك شخصية ملهمة فحياتي جدا وقريبة إلى قلبي وبيقولوا إني شبهها جدا هي الفنانة الجميلة ( إسعاد يونس)
إسعاد يونس هي فنانة ملهمة أوي ل عصمت الصغير وحقيقي فعلا بتسببلي سعادة وتفاؤل كبير لما بشوفها وأتابعها وأعتقد إن فيا جزء كبير من شخصيتها سواء الفنية أو الواقعية